Grupos de Apoio á Marentalidade
A Intervención Familiar
A intervención supón unha atención personalizada de carácter integral con apoio psicolóxico, social e educativo, o que permite romper as dinámicas de funcionamento deterioradas dentro da familia.
Fortalecendo as competencias marentais na crianza
Na foto vemos algúns dos traballos realizados nun dos nosos “Grupos de Apoio á Marentalidade”, un taller composto por 11 sesións que realizamos no marco do Programa de Intervención Familiar que desenvolvemos en Fundación Meniños.
Os grupos de apoio á marentalidade teñen como obxectivo xeral fortalecer as competencias marentais e os recursos resilientes de mulleres superviventes de violencia para así favorecer o bo trato infantil.
Trátase dun taller dirixido especialmente a mulleres que sobreviviron a situacións de violencia e que mostran dificultades para manter o coidado e a protección dos seus fillos e fillas a causa desta situación vivida.
Como obxectivos específicos, entre outros , diríxese a fortalecer o desenvolvemento de estratexias baseadas no bo trato para a resolución de conflitos e no manexo das situacións de estrés, ou favorecer a discusión no tocante ás crenzas e os modelos educativos das nais para reforzar unha visión positiva e realista do futuro.
