20 de novembro, Día Internacional dos Dereitos da Infancia

Hoxe, 20 de novembro conmemórase o día dos dereitos da infancia, un día perfecto para reflexionar sobre o noso papel na súa defensa, non queremos falar no seu nome, non queremos ocupar o seu lugar, non queremos restarlles protagonismo, senón que queremos ser a plataforma de transmisión da súa propia voz, porque a súa condición de persoas menores de idade non minora ningún dos seus dereitos como persoas, nin ningunha das súas capacidades. Teñen voz, teñen opinión, e teñen necesidade e dereito a pronunciarse e a que se faciliten todas as canles que necesiten, e son estas canles, ferramentas e espazos físicos e institucionais, os que deben ser adaptados para que poidan facer uso deles. 

Queremos contribuír decisivamente a deixar de lado consideracións adultocentristas que, aínda que sexa con voa vontade, usurpan, desacreditan e relegan a voz da infancia. Para iso é fundamental otorgarlle á infancia, aos nenos e ás nenas, o valor que teñen, abandonar para sempre a súa instrumentalización, e devolverlles o protagonismo imprescindible para construír unha sociedade na que sexan un axente político recoñecido.

Estes tempos de pandemia tamén nos teñen mostrado desgarradoramente como nenos e nenas son relegados, invisibilizados, e incluso culpados. 

A infancia é tremendamente vulnerable, esa vulnerabilidade ha de servir para favorecer e fortalecer a súa presencia, a súa opinión, os seus intereses, o seu benestar.

O noso labor é a protección da infancia e nesta protección, eles e elas son os protagonistas, teñen moito que dicir e o que din non debe ser silenciado, protéxese dándolles voz, outorgándolles credibilidade, respectando o seu pronunciamento, facilitándolles canles seguras, organizadas e accesibles para a participación, e elevándoos a actores políticos indispensables na construción da sociedade. 

Contribuíndo a este obxectivo, realizamos unha serie de entrevistas a rapazas e rapaces de entre 11 e 18 anos dándolles a oportunidade de expresar as súas vivencias e inquedanzas desde o comezo da COVID19 e como a pandemia afecta aos seus dereitos.
Reocollémolas baixo o título: “Os dereitos da infancia, en corentena. Teño dereito a dicir o que penso”, que podes descargar aquí:

Os máis pequenos e pequenas do programa CaixaProinfancia de Pontevedra plasmaron os seus desexos respecto aos dereitos da infancia a través de cartas e debuxos dos que vos amosamos aquí unha escolma.